主頁強積金知識強積金儲蓄強積金表現保留帳戶演講者影片關於積金保健坊聯絡我們

強積金知識101

僱主篇

1. 如果我唔滿意而家用緊嘅強積金服務供應商嘅表現,我可唔可以轉換服務供應商?要有咩嘢手續呢?
  答: 你係有權轉換另一個強積金服務供應商,而且將僱員嘅累算權益轉移到新計劃。如果要轉換服務供應商,你需要向新計劃嘅受託人提出申請,當新受託人接獲你嘅申請之後,會同現有計劃受託人安排轉移。

2. 我啲僱員經常向我表示不滿我哋公司而家用緊嘅強積金計劃啲基金表現,其實佢哋自己可唔可以選擇強積金計劃呢?
  答: 根據現時《強積金條例》,係由僱主負責選擇強積金計劃,但係你可以為僱員採用一個或以上嘅核准強積金計劃以供他們揀選,而且,在選擇時,你亦都可先徵詢僱員嘅意見。

3. 我係經營家庭式生意,老婆仔女一齊幫我打理,我要唔要幫佢哋供強積金呀?
  答: 如果你屋企人幫你手打理生意,而佢哋又同你同住嘅話,你就唔駛幫佢哋供強積金。如果佢哋唔係同你一齊住,你就要幫佢哋安排參加強積金計劃供款啦。

4. 我間公司裡面請咗幾個海外僱員,佢哋需唔需要參加強積金計劃呢?
  答: 如果你啲海外僱員持有工作簽証,而佢哋又獲准入境或留港工作唔超過13個月,又或者已經參加海外嘅公積金計劃、退休金計劃、退休計劃或離職金計劃,咁佢哋就可獲豁免遵守《強積金條例》,唔駛參加強積金計劃。

5. 如果我公司嘅僱員薪酬係行佣金制度,人工個個月都唔同,咁我每個月幫佢哋供嘅強積金供款係唔係都唔固定呀?
  答: 係呀!因為你每個供款期嘅強制性供款係按照嗰段期間嘅有關入息而計算。假如僱員每個供款期嘅人工唔固定,每期嘅強制性供款亦都相應咁改變。

6. 如果我需要向僱員發放遣散費或者長期服務金,咁我應該點做呀?
  答: 根據《僱傭條例》,你必須响適當嘅情況下向你嘅僱員支付遣散費/長期服務金。俾咗錢之後,你可以向強積金計劃受託人申請响嗰個僱員嘅累算權益中僱主供款嗰部分(如果有嘅話)提取有關款項,用嚟抵銷番俾咗佢嘅遣散費/長期服務金。

僱員篇

1. 我响一間香港公司打工,但係公司派我去內地分公司做嘢。咁嘅情況下,我會唔會受強積金制度保障呢?
  答: 如果你做嘢間公司係响本港註冊,而你同僱主嘅僱傭合約受本港嘅《僱傭條例》所管限嘅,咁無論你响邊度工作,你嘅僱主都必須安排你參加強積金計劃。

2. 我只係做份兼職,每個星期做少過18個鐘頭,咁我需唔需要參加強積金計劃呀?
  答: 如果你根據僱傭合約連續受僱唔少過60公曆日,無論你返幾多個鐘頭工,你僱主都需要安排你參加強積金計劃。

3. 如果我同時有超過一份工作,咁係唔係每個僱主都要幫我安排參加強積金計劃?
  答: 無錯。只要你是根據僱傭合約連續受僱唔少過60公曆日,每個僱主都要安排你參加強積金計劃。

4. 強積金計劃嘅受託人收到僱主嘅供款後會點樣處理?
  答: 受託人會將供款投資响你選擇嘅投資組合。你嘅供款同埋累算權益會由保管人同受託人保管,一直保留响計劃內,直到你合資格提取累算權益或者將權益轉移到另一個計劃為止。

5. 假如我因為行為不當、欺詐或有唔誠實嘅行為而被僱主解僱,僱主可唔可以扣起我嘅累算權益中僱主強制性供款嗰部分呢?
  答: 唔可以。僱主強制性供款一經支付受託人,就會全數歸屬俾僱員作為累算權益。除咗明確用嚟抵銷須支付僱員嘅遣散費或長期服務金之外,僱主係唔可以扣起已經為僱員供咗嘅強制性累算權益。但係僱主自願性供款所累算嘅權益可唔可以扣,就要睇計劃嘅管限規則而定。

6. 如果我任職間公司倒閉,我嘅累算權益會唔會無晒呢?
  答: 由於累算權益係由保管人透過信託安排保管响計劃內,所以,僱主結業唔會對強積金計劃內嘅累算權益造成影響。


版權所有。卓譽金融服務有限公司 2009。不得轉載。 重要資料/條款細則
此網站配合 Internet Explorer 6 或以上之瀏覽器使用效果最佳。